طاقتور ترین طوفان ’ڈولفن‘ جاپان کے بعد چین سے ٹکرا گیا | Urdu News
طاقتور ترین طوفان ’ڈولفن‘ جاپان کے بعد چین سے ٹکرا گیا
بیجنگ (10 اگست 2026): جاپان کے بعد چین میں طاقتور ترین طوفان ’ڈولفن‘ نے تباہی مچا دی، سیکڑوں پروازیں معطل جبکہ لاکھوں افراد گھروں کو چھوڑ گئے۔
گارڈین کی رپورٹ کے مطابق چین کے مشرقی ساحل سے ٹکرانے والے طاقتور سمندری طوفان ڈولفن نے شدید بارشوں اور تیز ہواؤں کے ساتھ بڑے پیمانے پر خطرات پیدا کردیے جبکہ حکام نے سیلاب اور لینڈ سلائیڈنگ کے خدشات کے پیش نظر ہنگامی اقدامات شروع کردیے ہیں۔
چینی محکمہ موسمیات کے مطابق طوفان ’ڈولفن‘ اتوار کی شام ساڑھے 5 بجے صوبہ ژی جیانگ کے شہر یُو ہوان کے قریب ساحل سے پوری طاقت سے ٹکرایا۔
اس وقت طوفان کے مرکز کے قریب ہواؤں کی زیادہ سے زیادہ رفتار تقریباً 151 کلومیٹر فی گھنٹہ ریکارڈ کی گئی، جو کیٹیگری ون کے سمندری طوفان کے برابر ہے۔
چین پہنچنے سے قبل ڈولفن جاپان کے جنوبی علاقے اوکیناوا سے بھی گزرا، جہاں شدید موسم کے باعث 6 افراد زخمی ہوئے جبکہ 50 ہزار سے زائد عمارتوں کی بجلی منقطع ہوگئی۔
طوفان کے خطرے کے پیش نظر چین میں بڑے پیمانے پر حفاظتی اقدامات کیے گئے ہیں، کم از کم 30 ہزار 300 افراد کو محفوظ مقامات پر منتقل کیا گیا، جبکہ شنگھائی میں تقریباً 1500 پروازیں منسوخ کردی گئیں اور بحری جہازوں کو بندرگاہوں میں رہنے کی ہدایت کی گئی ہے۔
حکام نے آبی ذخائر، پہاڑی ندی نالوں، لینڈ سلائیڈنگ کے خطرے والے علاقوں، تعمیراتی مقامات اور سیاحتی مراکز کی نگرانی بھی بڑھا دی ہے۔
محکمہ موسمیات کے مطابق آج بروز پیر ژی جیانگ، شنگھائی، شمالی فوجیان، شمال مشرقی جیانگ شی، وسطی و جنوبی آنہوئی اور جیانگ سو کے بیشتر علاقوں میں تیز موسلا دھار بارش کا امکان ہے۔ وسطی اور مشرقی ژی جیانگ کے بعض علاقوں میں 250 سے 500 ملی میٹر تک بارش ہوسکتی ہے۔
قومی موسمیاتی مرکز کے چیف فورکاسٹر وانگ ہائی پنگ کے مطابق طوفان ڈولفن مغرب کی جانب بڑھتے ہوئے وسطی اور جنوب مغربی چین کی طرف جائے گا، جہاں اس کی رفتار بتدریج کم ہونے کا امکان ہے۔
طوفان کے باعث چین کے مشرقی حصے میں ٹرانسپورٹ کا نظام بھی شدید متاثر ہوا ہے، جبکہ 10 لاکھ سے زائد افراد کو محفوظ مقامات پر منتقل کیے جانے کی اطلاعات ہیں۔
اہم ترین
Comments
Post a Comment