پاکستان بزنس فورم کا پیٹرول پمپس بند کرنے کا فیصلہ واپس لینے کا مطالبہ | Urdu News
پاکستان بزنس فورم کا پیٹرول پمپس بند کرنے کا فیصلہ واپس لینے کا مطالبہ
کراچی : پاکستان بزنس فورم نے پیٹرول پمپ ایسوسی ایشن سے ہڑتال کا فیصلہ واپس لینے کا مطالبہ کردیا۔
تفصیلات کے مطابق پاکستان بزنس فورم نے پیٹرول پمپ ایسوسی ایشن کی جانب سے ہڑتال کی کال پر شدید تشویش کا اظہار کرتے ہوئے اس فیصلے پر نظرِ ثانی کا مطالبہ کردیا۔
فورم نے واضح کیا ہے کہ موجودہ غیر معمولی حالات میں ہڑتال کا کوئی بھی اقدام عوام اور ملکی معیشت کے مفادات کے سراسر خلاف ہوگا۔
پاکستان بزنس فورم کے چیف آرگنائزر احمد جواد نے پیٹرول پمپ ڈیلرز کے مطالبات اور ہڑتال کی حکمت عملی کو غیر مناسب قرار دیتے ہوئے کہا پیٹرول پمپ ایسوسی ایشن موجودہ ملکی حالات میں ہڑتال جیسا یکطرفہ فیصلہ مسلط نہیں کر سکتی۔
ان کا کہنا تھا کہ موجودہ معاشی صورتحال میں ڈیلرز کا مارجن بڑھانے کا مطالبہ درست نہیں، ڈیلرز کو اس وقت فی لیٹر تقریباً 8 روپے مارجن حاصل ہو رہا ہے، جو کہ کافی ہے۔
احمد جواد نے حکومت کی جانب سے پیٹرولیم مصنوعات کی قیمتوں کو روزانہ کی بنیاد پر مقرر کرنے کی تجویز پر شدید تنقید کرتے ہوئے سوال اٹھایا اگر حکومت روزانہ پیٹرولیم مصنوعات کی قیمتیں مقرر کرنا شروع کر دے گی تو ملک کا معاشی نظام کیسے چلے گا؟
پاکستان بزنس فورم نے حکومت پر زور دیا ہے کہ وہ روزانہ کی بنیاد پر پیٹرولیم مصنوعات کی قیمتوں کے تعین کا فیصلہ فوری طور پر واپس لے۔
فورم نے حکومت سے مطالبہ کیا ہے کہ عوام اور کاروباری طبقے کو ریلیف دینے کے لیے پیٹرولیم لیوی کو ایک ماہ کے لیے موخر کیا جائے تاکہ معاشی پہیہ بلا تعطل چلتا رہے۔
اہم ترین
Comments
Post a Comment